"EKSTER KARITATO NE EKZISTAS SAVO"
Karitato:  bonvolo por ĉiuj, indulgemo kontraŭ aliulaj
 neperfektaĵoj, pardono de la ofendoj. (LS, 886)

Internacia Spiritisma Konsilantaro

 

SPIRITISMA MOVADO 

"La Spiritoj sciigas, ke estas alveninta la tempo difinita de la Providenco por universala manifestado kaj ke, kiel adjutantoj de Dio kaj plenumantoj de Lia volo, ili havas la mision instrui la homojn kaj klarvidigi ties konsciencojn; tiel malfermiĝas nova epoko por la rebonigo de la Homaro." Allan Kardec (La Libro de la Spiritoj - Antaŭparolo)

Kio ĝi estas ?

• Spiritisma Movado estas la tuto de la agadoj, kiuj celas studi, disvastigi kaj praktiki la Spiritisman Doktrinon, enhavatan en la bazaj verkoj de Allan Kardec, metante ĝin je la servo kaj dispono de la tuta Homaro.

• La agadoj, konsistigantaj la Spiritisman Movadon, estas plenumataj de individuoj, unuope aŭ arope, krom ankaŭ de Spiritismaj Institucioj.

• La Spiritismaj Institucioj enkalkulas:

• La Grupojn, Centrojn aŭ Spiritismajn Societojn, kiuj disvolvas ĝeneralajn agadojn por studo, disvastigado kaj praktikado de la Spiritisma Doktrino kaj kiuj povas esti malgrandaj, mezaj aŭ grandaj Institucioj;

• La Federaciajn Asociojn, kiuj disvolvas agadojn celantajn la unuiĝon de la Spiritismaj Institucioj kaj la unuecigon de la Spiritisma Movado;

• La Fakajn Asociojn, kiuj disvolvas specifajn spiritismajn agadojn, kiel ekzemple tiujn por helpo kaj progresigo sociaj kaj tiujn por doktrina disvastigado.

• La Malgrandajn Grupojn por Studado de Spiritismo, ĉefe celantajn havigi la komencan instruadon pri la Spiritisma Doktrino.

__ · __

 

Influo de Spiritismo sur la Progreson 798. Ĉu Spiritismo iam fariĝos vulgara kredo aŭ ĉu ĝi daŭros plu kiel aparta doktrino de kelkaj personoj ? "Certe ĝi fariĝos vulgara kredo kaj signos novan epokon en la historio de la Homaro, ĉar ĝi troviĝas en la Naturo kaj tempo venis, kiam ĝi devas okupi lokon inter la homaj okazoj; tamen ĝi devas elporti grandajn batalojn, prefere kontraŭ intereso ol kontraŭ konvinkiteco, ĉar estus senutile ignori, ke al iuj personoj interesas kontraŭbatali ĝin, iuj pro memamo, aliaj pro tute materiaj kaŭzoj; sed tiuj kontraŭuloj, troviĝante pli kaj pli izolitaj, estos fine devigitaj pensi kiel ĉiuj, alie ili vokos al si mokridon." (La Libro de la Spiritoj - Tria Parto - Ĉapitro VIII)

SPIRITISMAJ GRUPOJ, SOCIETOJ AŬ ASOCIOJ

"Korespondante inter si, vizitante unu alian, interkonigante siajn observojn, tiaj grupoj povas jam nun estigi la kernon de la granda spiritista familio, kiu iam kunligos ĉiujn opiniojn kaj kunigos la homojn en unu solan senton de frateco, sigelitan de la kristana karito." Allan Kardec (La Libro de la Mediumoj - ĉap. xxix - N-ro 334)

Kio ili estas ?

La Spiritismaj Grupoj, Societoj aŭ Asocioj:

• estas centroj de studo, frateco, preĝo kaj laboro, praktikataj laŭ la spiritismaj principoj;

• estas lernejoj de spirita kaj morala edukado, kiuj laboras laŭ la kriterioj de la Spiritisma Doktrino;

• estas lokoj por frateca helpado al ĉiuj, kiuj iras tien, serĉante orientadon, klarigon, helpon aŭ konsolon;

• estas laborejoj, kiuj havigas al siaj frekventantoj oportunon por sin ekzerci al la interna pliboniĝo per aplikado de la Evangelio al sia agado;

• estas domoj, en kiuj infanoj, junuloj, plenkreskuloj kaj maljunuloj kunvivas, studas kaj laboras, tiel unuigante siajn familiojn sub la orientado de Spiritismo;

• estas rifuĝejoj de konstrua paco, kiuj havigas al siaj frekventantoj oportunon por spirita revigliĝo kaj frata unuiĝo per la praktikado de la admono "Amu vin, unuj la aliajn";

• estas centroj karakterizataj de tiu sama simpleco reganta la unuajn grupojn de la primitiva Kristanismo, pro la praktikado de la karitato kaj pro la absoluta foresto de ikonoj, simboloj, ritaroj aŭ ia ajn formo de ekstera kulto;

• estas la fundamentaj unuoj de la Spiritisma Movado.

Ĝiaj celoj

La Spiritismaj Grupoj, Societoj aŭ Asocioj celas:

• starigi la studon, disvastigadon kaj praktikadon de la Spiritisma Doktrino, akceptante la personojn:

• kiu serĉas klarigon, gvidon kaj helpon por siaj problemoj spiritaj, moralaj kaj materiaj;

• kiuj volas koni kaj studi la Spiritisman Doktrinon;

Ĝiaj bazaj aktivecoj

La Spiritismaj Grupoj, Societoj aŭ Asocioj havas jenajn bazajn aktivecoj:

• efektivigi, en formo programa, metoda aŭ sistema, kunvenojn por studado de la Spiritisma Doktrino, destinatajn al personoj de ĉiuj aĝoj kaj kultur-sociaj niveloj, kunvenojn kiuj havigu ampleksan, profundan sciadon pri Spiritismo laŭ ĉiuj ties aspektoj;

• efektivigi kunvenojn por studado de la Evangelio laŭ la Spiritisma Doktrino, fluigado de emanaĵoj kaj perdialoga frateca helpado, celante la personojn, kiuj serĉas kaj frekventas la spiritismajn centrojn por ricevi orientadon, klarigojn, helpon, spiritan kaj moralan gvidadon;

• efektivigi kunvenojn por studado, edukado kaj praktikado de la mediumeco, surbaze de la spiritismaj principoj kaj celoj, en kiuj kunvenoj oni ricevu instruadon, gvidadon kaj preparadon por la mediumaj aktivecoj;

• efektivigi la disvastigadon de la Spiritisma Doktrino per ĉiuj rimedoj kaj kanaloj de socia komunikado konformaj al la spiritismaj principoj, kiel prelegoj, konferencoj, libroj, ĵurnaloj, revuoj, bultenoj, broŝuretoj, mesaĝoj, radio- kaj televid-elsendoj, afiŝoj, vidbendoj kaj sonbendoj;

• efektivigi kunvenojn por spiritisma evangelizado de infanoj kaj gejunuloj, en formo programa, metoda aŭ sistema, ĉi tiujn akceptante, instruante kaj gvidante laŭ spiritismaj principoj;

• efektivigi socihelpan kaj socialtigan servadon, laŭ spiritismaj kriterioj, destinatan al bezonuloj serĉantaj materian helpon: ilin helpante en iliaj pli urĝaj bezonoj; ilin progresigante per kursoj kaj laboroj celantaj ilian kvalitiĝon kaj profesiiĝon; kaj ilin klerigante per la moralaj instruoj de la Evangelio laŭ la Spiritisma Doktrino;

• stimuli kaj gvidi ĉiujn vizitantojn al starigo kaj subtenado de hejma kunveno por studado de la Evangelio, kiel apogo al la spirita harmonio en siaj familioj;

• partopreni en tiuj aktivecoj celantaj tiel la unuiĝon de la spiritistoj kaj de la Spiritismaj Institucioj, kiel ankaŭ la unuecigon de la Spiritisma Movado, kunigante klopodojn, kunligante spertojn, interŝanĝante helpon kaj apogon, plibonigante la spiritismajn aktivecojn kaj plivigligante la agadon de la spiritistoj;

• plenumi la administrajn taskojn necesajn por sia bona funkciado, konformajn al sia organiza strukturo kaj al la leĝaro de sia lando.

__ · __

LABORO POR LA FEDERACI-UNUECIGO DE LA SPIRITISMA MOVADO

"En Spiritismo gravas la esenco; alkroĉiĝi al la formo estas infanaĵo neinda je ĝia grandeco. De tio venas, ke la centroj penetritaj de la vera spirito de Spiritismo devos fratece etendi al si reciproke la manojn kaj unuiĝi por kontraŭbatali siajn komunajn malamikojn, nome nekredemon kaj fanatikecon." Allan Kardec (Postmortaj Verkoj - Konstitucia Organizo de Spiritismo - N-ro VI)

Kio ĝi estas ?

• Laboro por la federaci-unuecigo de la Spiritisma Movado estas rimed-agado celanta fortigi, faciligi, ampleksigi kaj perfektigi la Spiritisman Movadon por plenumo de ties celado, nome starigi la studadon, la disvastigadon kaj la praktikadon de la Spiritisma Doktrino.

• Ĝi rezultas el la unuiĝo frateca, solidara, volonta, konscia kaj ago-plenuma de la spiritistoj kaj Spiritismaj Institucioj, pere de la interŝanĝo de informoj kaj spertoj, de reciproka helpado kaj de kunlaborado.

• Ĝi estas nepre necesa por la fortiĝo, perfektiĝo kaj kreskado de la Spiritismaj Institucioj kaj por la korekto de eventualaj dekliniĝoj de la ĝusta agado, doktrina kaj administra.

Kion ĝi efektivigas

• Konstantan kontakton inter la Spiritismaj Grupoj, Societoj aŭ Asocioj, starigante ilian unuiĝon kaj integriĝon kaj al ili disponigante proponojn, spertojn, laborojn kaj apog-programojn, kiujn ili bezonus por siaj aktivecoj.

• Kunvenojn, renkontiĝojn, kursojn, interfratiĝojn kaj aliajn eventojn destinatajn al spiritistaj direktantoj kaj laborantoj por renovigo kaj aktualigo de iliaj sciado doktrina kaj administra, tiel celante la perfektigon kaj ampleksigon de la aktivecoj de l’ Spiritismaj Institucioj kaj la starigon de novaj kampoj de aktiveco kaj laborado.

• Eventojn destinatajn al la granda publiko por disvastigo de la Spiritisma Doktrino, cele al tio, ke Spiritismo fariĝu ĉiam pli kaj pli konata kaj des pli bone praktikata.

Kiel ĝi estas strukturita

• Per la unuiĝo de la Spiritismaj Grupoj, Societoj aŭ Asocioj, kiuj, konservante sian aŭtonomecon kaj agliberecon, kunigas klopodojn kaj kunligas spertojn, celante la konstantan fortikiĝon kaj perfektigon de siaj aktivecoj kaj de la Spiritisma Movado entute.

• La kuniĝintaj Spiritismaj Grupoj, Societoj aŭ Asocioj konsistigas la Instituciojn kaj Organizaĵojn federaciajn aŭ unuecigajn de la Spiritisma Movado je skaloj loka, regiona, ŝtata aŭ tutlanda.

• La tutlandaj Institucioj kaj Organizaĵoj federaciaj kaj unuecigaj de la Spiritisma Movado konsistigas la Organizaĵon por mondskala unuecigo de la Spiritisma Movado, nome la Internacian Spiritisman Konsilantaron.

Gvidlinioj de la federaci-unueciga laboro de la Spiritisma Movado

• La laboro federaci-unueciga de la Spiritisma Movado, same kiel tiu por la unuiĝo kaj de la spiritistoj kaj de la Spiritismaj Institucioj, baziĝas sur la principoj de frateco, solidareco, libereco kaj respondeco, kiel preskribas la Spiritisma Doktrino.

• Ĝia karakteriza trajto estas doni sen postuli kompensojn, helpi sen meti kondiĉojn, elmontri sen altrudi rezultatojn kaj unuigi sen malhelpi iniciatojn, antaŭgardante valorojn kaj individuajn karakterizaĵojn, tiel de personoj kiel ankaŭ de Institucioj.

• La ĉiam memvolaj kaj konsciaj integriĝo kaj partoprenado de la Spiritismaj Institucioj en la federaci-unuecigaj aktivecoj de la Spiritisma Movado devas efektiviĝi en spirito de egaleco, sen submetiĝo, ĉe kiu estu respektataj kaj antaŭgardataj iliaj sendependeco, aŭtonomeco kaj aglibereco.

• Estas nedeviga la uzo de ĉiu ajn programo aŭ helpmaterialo disponigita al la Spiritismaj Institucioj, kiuj mem decidos pri ĝia adopto aŭ ne, parte aŭ entute, aŭ pri ĝia adapto al siaj bezonoj aŭ interesoj.

• En ĉiuj federaci-unuecigaj aktivecoj de la Spiritisma Movado oni devas ĉiam stimuli la metodan, konstantan kaj profundan studadon de la verkoj de Allan Kardec, konsistigantaj la Spiritisman Kodigon, reliefigante la bazojn, sur kiuj sidas la Spiritisma Doktrino.

• Ĉiuj federaci-unuecigaj aktivecoj de la Spiritisma Movado ĉefe celas meti, kun simpleco kaj klareco, la konsolan kaj gvidan mesaĝon de la Spiritisma Doktrino sub la disponon kaj en la servon de ĉiuj homoj, precipe de tiuj plej simplaj, pere de la studo, preĝo kaj laboro.

• En ĉiuj federaci-unuecigaj aktivecoj de la Spiritisma Movado oni devas ĉiam antaŭgardi al ties partoprenantoj la naturan rajton, preskribitan de la Spiritisma Doktrino, pensi, krei kaj agi, sed zorgante, ke ĉiu ajn laboro nepre havu kiel bazon la verkojn de Allan Kardec.

__ · __

Misio de la Spiritistoj "Iru do kaj portu la dian parolon: al la grandaj, kiuj ĝin malŝatos, al la kleraj, kiuj postulos pruvojn, al la malgrandaj kaj simplaj, kiuj ĝin akceptos; ĉar precipe inter la martiroj de la laboro, de tiu surtera provado, vi trovos fervoron kaj fidon." "Via falango armu sin do per decidemo kaj kuraĝo ! Ek al la laboro ! la plugilo estas preta; la tero atendas; plugu ! Iru kaj danku Dion pro la glora tasko, kiun Li konfidis al vi; sed atentu, ke inter la vokitoj al Spiritismo multaj devojiĝis; rigardu do vian vojon kaj sekvu la veron." Erasto (La Evangelio laŭ Spiritismo - Ĉap. XX - n-ro 4)

RIMARKIGOJ

1. La Statuto de la Internacia Spiritisma Konsilantaro rimarkigas:

• La Internacia Spiritisma Konsilantaro (ISK) estas organizo rezultinta el la unuiĝo, je tutmonda skalo, de la Asocioj reprezentantaj la koncernajn Spiritismajn Landajn Movadojn.

• Estas esencaj celoj de ISK:

I - starigi la solidaran kaj fratecan unuiĝon de la Spiritismaj Institucioj en ĉiuj landoj kaj la unuecigon de la tutmonda Spiritisma Movado;

II - stimuli la studadon kaj la disvastigadon de la Spiritisma Doktrino laŭ ties tri bazaj aspektoj: scienca, filozofia kaj religia;

III - stimuli la praktikadon de la materia, morala kaj spirita karitato laŭ la Spiritisma Doktrino.

• La celoj de ISK baziĝas sur la Spiritisma Doktrino sistemigita de Allan Kardec kaj sur la samprincipaj verkoj, kiuj ĝin komplementas.

 

• Estas nedeviga la uzo de ia ajn programo aŭ helpmaterialo proponita de ISK al la Spiritismaj Institucioj, kiuj mem decidos pri ĝia adopto aŭ ne, parte aŭ entute, aŭ pri ĝia adapto al siaj bezonoj aŭ interesoj.
• La Institucioj, kiuj membras al ISK, konservas sian aŭtonomecon, sendependecon kaj agliberecon. La membreco al ISK havas kiel fundamenton kaj celon la solidarecon kaj la fratecan unuiĝon.

·

2. La aktivecoj menciitaj en ĉi tiu dokumento havas la karakteron de sugesto. Uzante sian memstarecon, la Spiritismaj Institucioj povos ilin plenumi laŭmezure kiel ilia disvolviĝo kaj kresko starigos la koncernajn kondiĉojn kaj kiam iliaj direktantoj tion rigardos oportuna.

·

3. La spiritismaj aktivecoj ĉiam devos esti plenumataj en maniero konforma al la socimediaj karakterizaĵoj kaj al la leĝaro de la koncerna lando.

__ · __

La Laboristoj de la Sinjoro Alproksimiĝas la tempo, kiam realiĝos la aferoj antaŭdiritaj por la transformiĝo de la Homaro. Feliĉaj estos tiuj, kiuj estos laborintaj sur la kampo de la Sinjoro kun abnegacio kaj sen alia motivo ol karito ! Iliaj labortagoj estos pagitaj centoble pli, ol kiom ili esperis. Feliĉaj estos tiuj, kiuj diris al siaj fratoj: "Fratoj, ni kune laboradu kaj ni kunigu niajn klopodojn, por ke la mastro, alveninte, trovu finita la laboron"; ĉar la mastro diros al ili: "Venu al mi, vi, kiuj estas bonaj servantoj, vi, kiuj silentigis viajn ĵaluzojn kaj viajn malpacojn, por ke el tio ne venu malutilo en la verkon!" La Spirito de Vero (La Evangelio laŭ Spiritismo - Ĉap. XX - n-ro 5)

 

En la unueciga laboro En niaj vicoj, la unueciga laboro estu urĝa sed ne hasta. Unu aserto ŝajne nuligas la duan, sed ne tiel estas. Urĝa, ĉar ĝi al ni difinas la komunan celon; ne hasta, ĉar nenies konsciencon ni rajtas perforti. Ni tenu nin ĉe la celado unuigi, proksimigi, interfratigi kaj kompreni, kaj, se eble, ni starigu ĉie, kie Spiritismo brilas kiel lumlegendo, grupon, eĉ malgrandan, por studado de la Verkaro de Allan Kardec ĉe la lumo de la instruoj de la Kristo de Dio. La Spiritisma Doktrino havas esencajn aspektojn konsistigantajn trioblan tutaĵon. Neniun oni malhelpu en ties streboj al konstrua laborado kaj produktado. Kiu inklinas al la scienco, kulturu ĝin laŭ ties indeco; kiu sin donas al la filozofio, honoru ties postulatojn; kaj kiu sin dediĉas al la religio, sanktigu ties aspirojn; sed en ĉio kaj por ĉiuj superregu la Kardeca bazo, por ke ni ne perdu la ekvilibron sur la fundamentoj kie sidas nia organizado. Instrui, sed ankaŭ fari; kredi, sed ankaŭ ekzempli; kunvenigi, sed ankaŭ nutri. Nepre necesas konservi Spiritismon tia, kia ĝi estis transdonita de la Diaj Kurieroj al Allan Kardec: for de politikaj kompromisoj, sen religia profesieco, sen malnoblaj person-interesaj celadoj, sen avideco konkeri paseman surteran potencon. Allan Kardec estu la bazo de niaj studoj, planoj, aktivecoj kaj laboroj, por ke nia fido ne fariĝu ia hipnoto, per kiu la mallumo superregus malfortajn mensojn kaj ilin katenus dum jarcentoj da iluzio kaj sufero. Allan Kardec ni ne nur kredu aŭ sentu, diskonigu aŭ anoncu, kiel nian standardon, sed ja plene sekvu, suferante, plorante, de li penetrante nian vivon. Sen tiu bazo ne eblas forĝi tiun kristan-spiritistan karakteron, kiun la tumulta mondo de ni atendas pro la unuecigo. Amo de Jesuo super ĉiuj, vero de Kardec por ĉiuj. Bezerra de Menezes (Pecoj el la mesaĝo "Unuecigo", mediume skribita de F.C.Xavier - "Reformador", Decembro/1975)